ಲೈಟ್ ಹಾಕುವುದು..

ಇದು ಮನೆಯಲ್ಲಿ ಗುಂಡಿಯೊತ್ತಿ ಲೈಟ್ ಹಾಕಿದಂತಲ್ಲ, ನೊಣ ಅಡ್ಡಬಂದರೂ ಹಾರನ್ ಮಾಡಿ ಲೈಟ್ ಹಾಕುವ ದ್ವಿಚಕ್ರ ವಾಹನಗಳಂತಲ್ಲ, ದಿನವಿಡೀ ಉರಿವ ಸ್ಟ್ರೀಟ್ ಲೈಟ್ ಅಲ್ಲ.
ನಮ್ಮ ಊರಕಡೆ ಹಬ್ಬ, ಮದುವೆ ಮುಂತಾದ ಕಾರ್ಯಗಳಲ್ಲಿ ಮಾವಿನ ತೋರಣ ಕಟ್ಟುತ್ತಾರೆ. ಈಗೀಗ ಬಣ್ಣ ಬಣ್ಣದ ಲೈಟ್ಗಳು ಜಾಸ್ತಿಯಾಗಿ ಮಾವಿನೆಲೆಯ ತೋರಣ ಕಡಿಮೆಯಾದರೂ ಶುಭಕಾರ್ಯಗಳಿಗೆ ಮಾವಿನ ತೋರಣದ ಪದ್ದತಿ ಇನ್ನೂ ಜೀವಂತವಾಗಿದೆ. ಬೆಂಗಳೂರಲ್ಲೂ ಇದು ನಡೆದುಬಂದ ಪದ್ದತಿ.
ಹೊಸಪದ್ದತಿಯೊಂದನ್ನು ಎಲ್ಲರೂ ಗಮನಿಸಿರಬಹುದು [ತೀರಾ ಹೊಸದೇನಲ್ಲ ಬಿಡಿ..]. ಚೌತಿ, ದೀಪಾವಳಿ ಬಂತೆಂದರೆ ಸೀರೆ‍ ಬಟ್ಟೆ ಅಂಗಡಿಗಳು ಬಣ್ಣ ಬಣ್ಣದ ದೀಪಗಳ ಸರಮಾಲೆಗಳಿಂದ ಝಗಮಗಿಸುತ್ತಿರುತ್ತವೆ, ಅಕ್ಷಯ ತೃತೀಯದಂದು ಬಂಗಾರದ ಅಂಗಡಿಗಳು ಕಂಗೊಳಿಸುತ್ತಿರುತ್ತವೆ. ಕತ್ತಿಮಸೆದು ಕೂತ ಶಾಪಿಂಗ್ ಮಾಲ್ ಗಳಂತೂ ವರ್ಷವಿಡೀ ಹೊಳೆಯುತ್ತಿರುತ್ತವೆ. ಇರಲಿ.. ಬಟ್ಟೆ, ಬಂಗಾರ ಖರೀದಿಸುವುದೂ ಒಂದು ಶುಭಕಾರ್ಯವೇ.
ಆದರೆ.. ಹೊಸವರ್ಷ ಬಂತೆಂದರೆ ಸಾಕು... ತಗಳಪ್ಪಾ... ಊರಲ್ಲಿರುವ ಬಾರುಗಳಿಗೆಲ್ಲಾ ವೈನ್ ಶಾಪ್ ಗಳಿಗೆಲ್ಲಾ ಕಣ್ಣುಕೋರೈಸುವ ಬಣ್ಣಬಣ್ಣದ ದೀಪಗಳ ಸರಮಾಲೆ. ಹಾದಿಬೀದಿಗಳಲ್ಲಿರುವ ಸಣ್ಣಪುಟ್ಟ ಬಾರುಗಳಲ್ಲೆಲ್ಲಾ ಹಬ್ಬದ‌ ಸಂಭ್ರಮ.. ಅದೇನು ಹಬ್ಬವೋ.. ಸಂಭ್ರಮವೋ ನಾಕಾಣೆ....

ದೇವಸ್ಥಾನದ ಎದುರು ರೋಡಿನಲ್ಲಿ ಬೈಕ್/ಕಾರಿನಲ್ಲಿ ಕುಳಿತು ಕೈಮುಗಿಯುವ ಭಕ್ತಿ,
ದರ್ಶಿನಿಯಲ್ಲಿ ನಿಂತು ತಿನ್ನುವ,
ಕೌಂಟರ್ ನಲ್ಲಿ ನಿಂತು ಕುಡಿಯುವಷ್ಟೇ
"ಶೀಘ್ರ" ಫಲಕಾರಿಯಾಗಿರಬಹುದೇ..??

ಯಡ್ಡಿ

ಕಾಲು ಎಳೆದರೂ ಬೀಳಲಾರೆ
ಕತ್ತು ಹಿಡಿದರೂ ಕೇಳಲಾರೆ
ಕುರ್ಚಿ ಬಿಟ್ಟು ಏಳಲಾರೆನು
ಎಂದನಾ ನಮ್ಮ ಯಡ್ಡಿಯು...

ಮಂತ್ರಿ

ಮಂತ್ರಿ ಮಾಗಧರನ್ನು
ಕಂತ್ರಿ ನಾಯಿಗಳಂತೆ
ಕರೆಕರೆದು ಕೆರದಲ್ಲಿ
ಹೊಡೆಯೆಂದ ‍‍-ತಂತ್ರಜ್ಞ

OVER weight?

My doctor said: “According to Height to weight ratio chart, you are OVER weight. You are X kg more for your height”
Shocked! Explained him few Lateral thinking and Problem analysis techniques [Thanks to LnD (Learning and Development) program in my previous company] and said: “Always there will be multiple approaches to a problem. According to these techniques, my height is less for the weight".

I am no more an ‘OVER weight’ person. I am just ‘UNDER height’

ಗುಂಡಾಲಿ ಪಟ

ಸೂರ್ಯ ಚ‍ಂದ್ರ ಆಟೀನ್ ನನ್ನ ಕೈಯೊಳಗೆ
ಖಾಲೀ ಪರ್ಸು.. ನಿನ್ನ ಜೇಬೊಳಗೆ
ಪಟ ಮುಟ್ಟಿ ಮನೆ ದೇವ್ರ ನೆನೆದು ಬಿಡಿ
ಸಾಲ ಮಾಡಕ್ಕೆ ರೆಡಿಯಾಗಿಬಿಡಿ..

ಒಳ್ಳೆ ಲಕ್ಕು ಇತ್ತು ಅಂದ್ರೆ ನೀವು ಕೂಡಾ ಗೆಲ್ಲಬಹುದು
ಬೀಳೋದಿಲ್ಲ ಹಾಗೆ ಗುಂಡು ಪಟ ನಂದು
ನೀವು ಆಡಬೇಕು ಮೂರು ಗುಂಡು ನೆಚ್ಚಿಕೊಂಡು

ಗುಡು ಗುಡು ಸದ್ದು ಕೇಳಿಕೊಂಡು ಗ್ಯಾಸ್ ಲೈಟು ಹುಡುಕಿಕೊಂಡು
ಬಂದು ಗುಂಪು ಸೇರಿರಿ ಅಡಗಿಕೊಂಡು
ನಿಮ್ಮ ಅಕ್ಕ ಪಕ್ಕ ಇದ್ದವ್ರನ್ನ ನೋಡಿಕೊಂಡು

ಆಟ ಶುರು ಹಚ್ಚ ಬೇಡ ಸ್ವಲ್ಪ ತಡಿ
ಪಟ ಹೆಂಗೇ ಅಂತ ನೋಡಿ ಹೊಡಿ.

ಯಾವ್ದು ಇಲ್ಲಿ ಸಿಂಗಲ್ ಬಿತ್ತು ಯಾವ್ದು ಇಲ್ಲಿ ಡಬ್ಬಲ್ ಬಿತ್ತು
ಹೇಳುವುದು ಕಷ್ಟ ನೆನಪಿಟ್ಟುಕೊಂಡು
ನಾವ್ ಆಡಬೇಕು ಕುಕ್ಕರಗಾಲಲ್ ಕೂತುಕೊಂಡು

ಹೆಗ್ಡೇರ ಪೈಕಿ ನಾವು ಆಟ ನೋಡಕ್ ಬರುತ್ತೀವಿ
ಹಳೇ ನೋಟು ಅಷ್ಟು ಇಷ್ಟು ಇಟ್ಟುಕೊಂಡು
ನಾವು ಪಟ‌ ಇದ್ರೆ ಆಡಬಹುದು ಅಂದುಕೊಂಡು

ದುಡ್ಡು ಖಾಲಿ ಆದರೆ ಆಗ್ಲಿ ಬಿಡಿ
ಬೆಳಗಿನ್ ಜಾವದ ಆಟ ನೋಡಿ ಹೋಗಿ ಬಿಡಿ..

[ಜಾಕಿ 'ಎಕ್ಕ ರಾಜ ರಾಣಿ' ಕದ್ದಿದ್ದು....]

ಮಳೆ

ಮಳೆ ಹೊಯ್ದರೆ ಮುಳುಗುವ,
ಇಲ್ಲದಿರೆ ಒಣಗುವ
ಬೆಂದಕಾಳೂರಿನಲಿ
ಬೇಗ ಮನೆ ಸೇರಿದವನೇ
ಜಾಣ - ತಂತ್ರಜ್ಞ

ಎಮ್ಮೆನ್ಸಿ ಕೆಲಸ

ಊಟದೊಂದಿಗೆ ಸ್ವೀಟು ಇರಲೇ ಬೇಕಿಲ್ಲಿ
ಮೀಟಿಂಗು ನಡುನಡುವೆ ಕಾಫಿ ಟೀ ಬೇಕು
ತಿಂಗಳಿಗೆ ಒಂದೆರಡು ಪಾರ್ಟಿ ಇರದಿದ್ದರೆ,
ಎಮ್ಮೆನ್ಸಿ ಕೆಲಸದಲಿ ಮಜವೆಲ್ಲಿ ‍‍‍‍- ತಂತ್ರಜ್ಞ

ಟ್ರಾಫಿಕ್

ಒರಿಜಿನಲ್.........
ಮೂರು ಸಾಗರ ನೂರು ಮಂದಿರ ದೈವ ಸಾಸಿರವಿದ್ದರೆ
ಗಂಗೆಯಿದ್ದರೆ ಸಿಂಧುವಿದ್ದರೆ ಗಿರಿಹಿಮಾಲಯವಿದ್ದರೆ
ವೇದವಿದ್ದರೆ ಭೂಮಿಯಿದ್ದರೆ ಘನಪರಂಪರೆಯಿದ್ದರೆ
ಏನು ಸಾರ್ಥಕ ಮನೆಯ ಜನರೆ ಮಲಗಿ ನಿದ್ರಿಸುತಿದ್ದರೆ

ಡ್ಯೂಪ್ಲಿಕೇಟ್.......
ನೂರು ಸ್ಟೇಶನ್ ಟ್ರಾಫಿಕ್ ವಾರ್ಡನ್ ಪೋಲೀಸ್ ಸಾವಿರವಿದ್ದರೆ
ಸಿಗ್ನಲಿದ್ದರೆ ಟೈಗರಿದ್ದರೆ ವೀಡಿಯೋ ಕ್ಯಾಮರವಿದ್ದರೆ
ಮೆಟ್ರೋ ಇದ್ದರೆ ಮೋನೋ ಇದ್ದರೆ ವೋಲ್ವೋ ಬಸ್ಸುಗಳಿದ್ದರೆ
ಟ್ರಾಫಿಕ್ ಜಾಮನು ತಡೆಯಲಾಗದು ರೂಲ್ಸು ಮುರಿಯುತಲಿದ್ದರೆ

ಚಾಟು ಮಾಡಲು ಬೇಕು
ಮೈಲು ಕಳಿಸಲು ಬೇಕು
ನೆಟ್ಟು ಹುಡುಕಲು ಇದು ಬೇಕೇ ಬೇಕು
ಫೋಟೋ ವಿಡಿಯೋಗಳನು
ನೋಡಿ ಆನಂದಿಸುತ
ಗೂಗಲಿಗೆ ಮನಸಾರೆ "ಜೈ" ಅಂದ ತಂತ್ರಜ್ಞ

ಎಂಟರಿಂದ ಆರು

ಆರು ಎಂಟಾದರೇನು
ಎಂಟು ಆರಾದರೇನು
ಎಂಟರಿಂದ ಆರರ ಕೆಲಸ‌
ನಿನಗಲ್ಲ - ತಂತ್ರಜ್ಞ

ಅರಿವು

ಹೊಲ ಗದ್ದೆ ನೋಡಿಲ್ಲ ಫಲ ಪೈರು ತಿಳಿದಿಲ್ಲ
ಹಣ್ಣು ಕಾಯಿಯು ಬೆಳೆವುದೆಲ್ಲೆಂದು ಗೊತ್ತಿಲ್ಲ
ಪ್ಯಾಕು ಮಾಡಿದ ಫುಡ್ಡು ಒಂದೊಮ್ಮೆ ದೊರೆಯದಿರೆ
ಊಟಮಾಡುವ ಪರಿಯನಿವ ಅರಿತಿಲ್ಲ - ತಂತ್ರಜ್ಞ

ಟ್ಯಾಕ್ಸ್

ಅಪ್ರೈಸಲ್ ಬಂದಾಗ
ಅಪ್ಪಿ ಮುತ್ತಿಟ್ಟಂತೆ
ಟ್ಯಾಕ್ಸ್ ಫೈಲಿಂಗ್ ಬಂದಾಗ
ಎದ್ದು ಎದೆಗೊದ್ದಂತೆ - ತಂತ್ರಜ್ಞ

ಮೀಟಿಂಗು

ಮೀಟಿಂಗು ಟೈಮ್ ವೆಸ್ಟು
ಎಂದೇಕೆ ಕೊರಗುವಿರಿ
ಮೀಟಿಂಗ್ ಇಲ್ಲದ ದಿನವಿಲ್ಲ, ಕೆಲವರಿಗೆ
ಮೀಟಿಂಗೆ ಟೈಂಪಾಸು - ತಂತ್ರಜ್ಞ

ತೂಕ

ಹೊತ್ತು ಹೊತ್ತಿಗೆ ಊಟ,ನಡುನಡುವೆ ಟೀ ಬ್ರೇಕು
ತಿಂದುದಲುಗದ ಹಾಗೆ ಏರಿಳಿವ ಲಿಫ್ಟುಗಳು
ಕುತಲ್ಲಿಯೇ ಕೂತು ದಿನಕಳೆವ ಈತನಿಗೆ
ತೂಕವೇರದೇ ಇರುವ ಪರಿಯೆಂತು - ತಂತ್ರಜ್ಞ

ಖುಶಿ

ಮಳೆ ಬಂದ ಖುಶಿ ಇಲ್ಲ,
ಉರಿ ಬಿಸಿಲ ಧಗೆಯಿಲ್ಲ
ದಿನವಿಡೀ ಕುಳಿತು ಕೀ ಕುಟ್ಟುವವಗೆ
ಜೀವನದ ರುಚಿಯಿಲ್ಲ ತಂತ್ರಜ್ಞ

ಮ್ಯಾನೇಜರ್

ಕಾಪಿ ಮಾಡಲು ಕಲಿತು, ಪೇಸ್ಟು ಮಾಡಲು ಮರೆತು
ಕಟ್ಟು ಕಾಪಿಯಲಿ ಕಂಫ್ಯೂಸು ಆಗುತಿರೆ
ಎಡಿಟರ್ರು ಬದಿಗಿಟ್ಟು ಔಟ್ ಲುಕ್ಕು ತೆರೆದಿಟ್ಟು
ಮ್ಯಾನೇಜರಾಗೆಂದ ತಂತ್ರಜ್ಙ

ವೀಕೆಂಡು

ವೀಕೆಂಡು ಬಂತೆಂದು ಹುಚ್ಚೆದ್ದು ಕುಣಿಯದಿರಿ
ಸೆಕೆಯಲ್ಲಿ ಬಳಲಿ ಬಾಯಾರಿ ಬಸವಳಿವ
ವೀಕೆಂಡಿಗಿಂತ ವೀಕ್ ಡೇನೆ ಹಿತವೆಂದ ತಂತ್ರಜ್ಞ

ಬಗ್

ಬಗ್ ಬಗ್ಗೆಂದು ಯಾಕೆ
ಬೆನ್ನು ಬೀಳುವಿರಿ,
ಬಗ್ಗಲ್ಲವೋ ಅದು
ಹೊಸಾ ಫೀಚರ್ರು ನೋಡೆಂದ ತಂತ್ರಜ್ಞ

ಏಸಿ..

ಏಸಿಯಲಿ ಕೂತವಗೆ
ಬೇಸಗೆಯ ಬಿಸಿಯಿಲ್ಲ,
ಬಿಸಿಲಲ್ಲಿ ಬೇಯುವವ‌ಗೆ
ಏಸಿಯ ಹಂಗಿಲ್ಲ ತಂತ್ರಜ್ಞ...