ಮೊದಲ ನೋಟದಿ ಕಂಡೆ
ನಿನ್ನ ಮುಖ ಚಂದ್ರವ‌
ಬೆರಗುಗಣ್ಣಲಿ ನೋಡಿ
ನಗುವ ನಿನ ಛ‍ಂದವ

ಮುದ್ದು ಮುಖದಲಿ ಬೆರೆತ‌
ಹೊಳೆವ ಮೃದು ಕೆನ್ನೆಯ‌
ಮೌನದಲ್ಲಿಯೇ ಮುಳುಗಿ
ಸೆಳೆವ ನಿನ ಜಾಣ್ಮೆಯ

ತಂಪು ಬೆಳದಿಂಗಳ‌
ತಂದೆ ಬಾನಿನಲಿ
ಮರುಳಾದೆ ನಾನಿನಗೆ
ಮೊದಲ ಸವಿ ಘಳಿಗೆಯಲಿ

ಅಪ್ಪಿಕೊಳಲೇ ನಿನ್ನ
ಮುತ್ತು ಕೊಡಲೇ ಒಂದು
ಮಲಗಿರುವ ತೊಟ್ಟಿಲನು
ಬಳಸಿ ಬಂದು.....

ಅಡಿಯಾಳು

ಅಡಿಯಾಳು ಆದವನು
ಮೊಗವೆತ್ತಿ ನಗಬಹುದೆ
ನಕ್ಕರೂ ಅದ‌ ಗ್ರಹಿಸುವ
ಜಗವಿಹುದೇ - ತಂತ್ರಜ್ಞ

ಹುಳುಕು

ಮುಚ್ಚಿಟ್ಟ ಕೆಂಡವದು
ಹೊಗೆಯನುಗುಳದಿರಬಹುದೆ
ಬೆಳೆಸಿದಾ ಹುಳುಕು ಕೆಡುಕಾಗಿ
ಪರಿಮಳವ ಸೂಸುವುದೆ ‍- ತಂತ್ರಜ್ಞ

ವಿಧಿಯಾಟ

ದಿಕ್ಕಿರದ ದಾರಿಯಲಿ
ಗುರಿಯಿರದ ಪಯಣದಲಿ
ಹರಿದು ಹೋಗುವ ಬದುಕ
ಬಂಡಿ ಹಲವು

ದಿಕ್ಕು ತಪ್ಪುವ ತನಕ‌
ಗುರಿಯ ಸೇರುವ ತವಕ‌
ನಡುನಡುವೆ ಕಳಚುವ‌
ಕೊಂಡಿ ಕೆಲವು

ಕಳಚಿಕೊಂಡಿದೆ ಕೊಂಡಿ
ಚಲನೆ ತಪ್ಪಿದೆ ಬಂಡಿ
ವಿಧಿಯಾಟ ಏನೆಂದು
ಅರಿಯಲಹುದೇ..?